Брагінчане працягваюць удзел у рэчыцкай лізе па міні-футболе. Каманда дэманструе стабільны рост і гатоўнасць даваць бой нават прызнаным лідарам. Мінулая субота вызначылася напружаным паядынкам супраць моцнага саперніка – Рэчыцкага лясгаса. Матч пацвердзіў: «Легіён» не мае намеру спыняцца на дасягнутым.

У пачатку першага тайма дамінавалі гаспадары. Рэчыцкі лясгас з першых хвілін уключыўся ў актыўную барацьбу, нагнятаў абстаноўку каля варот землякоў, ствараў шматлікія галявыя моманты. Здавалася, абарона брагінчан якая была пад пастаянным ціскам, пачне даваць збоі. Аднак, як гэта часта можна назіраць у спорце, пасля прапушчанага мяча, які мог бы дэмаралізаваць, «Легіён» нібы атрымаў новы зарад энергіі. Каманда пачала планамерна перабудоўваць гульню, змяшчаць акцэнт на контратакі. Гэты тактычны манеўр прынёс свой плён: брагінчанам удалося не толькі зраўняць лік, але і выраўняць ход гульні. Яны. прымусілі саперніка больш думаць аб абароне.

Другі тайм прадоўжыў лінію ўпартай барацьбы. Абмен забітымі мячамі захоўваў інтрыгу да апошніх хвілін. Брагінчане здолелі пераламаць ход гульні на сваю карысць, паказалі ўпэўненасць і камандны дух. Нягледзячы на чарговы прапушчаны мяч, які мог бы зноў змяніць баланс сіл, «Легіён» не зламаўся. Наадварот, канцоўка гульні прайшла пад поўным кантролем нашай дружыны. Фінальны акорд – яшчэ адзін дакладны ўдар у сетку саперніка. Вынік – баявая нічыя, якая, безумоўна, дадала ачкоў у скарбонку каманды.

Трэнерскі штаб і самі футбалісты «Легіёна» адзначаюць прагрэс, які каманда дэманструе з кожнай гульнёй.

– Мы адчуваем, як набываем упэўненасць і пачынаем даваць бой лідарам турнірнай табліцы, – каменціруе варатар Пётр Сачанка, чыя надзейная гульня неаднаразова ратавала каманду ў складаных сітуацыях.

Агульны аналіз выступленняў «Легіёна» ў рэчыцкай лізе дазваляе зрабіць аптымістычны вывад. Каманда дэманструе стабільнасць, не саступае ў прынцыповых матчах, што сведчыць аб правільным напрамку. Міні-футбольны сезон толькі набірае абароты, і ўсе гульцы, як вядома, знаходзяцца ў працэсе адаптацыі і пошуку аптымальнай формы. Аднак ужо зараз наша каманда паказвае, што гатова супрацьстаяць моцным апанентам. Узровень Рэчыцкай лігі, як адзначаюць самі ўдзельнікі, высокі. Каманды ўкамплектаваны футбалістамі з салідным вопытам і індывідуальным майстэрствам, што робіць кожны матч захапляльным.

Адметны і факт упэўненай перавагі брагінчан над адным з лідараў чэмпіянату – камандай «Рытм» (5:6). Поспех наглядна дэманструе, што «Легіён» здольны канкурыраваць з наймацнейшымі і дасягаць высокіх вынікаў. Для далейшага прагрэсу камандзе неабходна надаваць максімум увагі трэніровачнаму працэсу, адпрацоўваць да аўтаматызму гульнявыя сувязі і тактычныя схемы.

– «Легіён» сабраў амбіцыйных гульцоў, гатовых па поўнай выкладвацца ў кожным матчы. Іх самааддача і імкненне да перамогі ў спалучэнні з высокім узроўнем турніру, дзе выступаюць моцныя каманды як у фізічным, так і ў тэхнічным і тактычным плане, даюць падставы для аптымізму, – падкрэсліў старшы інспектар райвыканкама Юрый Крываручка.

Наступны матч землякі згуляюць у суботу. У 09.00 яны сустрэнуцца з «4FUN».

МАЯК ПАЛЕССЯ